|
Euver niéj kiendjes
Zèk, det vraumès, dów wètster alles van
Det hèlt zich op mèt ziene naobermán
't Lètste kiendje sjtáalt d'r sjpraekend op
't Haet dezelfden dieke kop
Oppen tómp van ós sjtraot is get besjtèld
Ze zègke det Truuj blink haet aangetèld
En Nuërke van Hannes löpt op 't lèts
Ich dink desse det niéts al wèts
Jao Miéna det nów in 't kingerbèd likt
Is lillik door d'n ooievaar gepikt
Dao haet 't dees kiër hèl gegaon
Mer 't haet alles góod doorsjtaon
Det sjtèl det in de Vaste mós trouwe
Is drök bezig mèt bôchten en sjouwe
Det vraumès is intrint oétgetèld
Zoë haet de nejster mich vertèld
Tummer Kuëb haet 'ne jónge zoon gekoch
Hae sjpróng mèt 't kink 'n gaat in de lôch
Dae sjtamhaojer kwaam beej niej maon
En alles is hiél flot gegaon
Klaos van Kläör hej de loupbôks aan vannach
En de wiésvrauw haet dao gèt jongs gebrach
Mer Angeniës is ocherm te bekláage
Dao is de kèr weer opgesjláage
Ofter beej Nel get ôngerwaeges is?
Ich bliéf d'r boéte, mer gluif 't besjlis
Dao loog kingerwas op de gróos
En dèn ister altiéd gèt loos
Drieka haet 't sjerkukske gekrege
Nao viéf jaor kwaam dao nummer nége
Mer 't löp neet euveral aeve gesjmaerd
Want beej ôs naeve is nag niks versjaerd
Zoë geit 't nów einmaol in 't laeve
Twellef is neet idderein gegaeve
Wie aod is beej Triena de jóngsten blaag?
't Haet wir 'ne krômme sjollik, zóog ich dees dáag
Det guëf dao einen aovesraege
Mer zônne groëte kingerzaege
Te groët? Mer..verdöld!
't Is Gaods wil en eige sjöld.
(Miep Heines ?)
|
|
|
